156. kirkjuráðsfundur 17. ágúst 2010

1. Fundarsetning, fundargerð síðasta fundar og staða verkefna

Fundurinn hófst kl. 9 með ritningarlestri og morgunbæn.

Mætt voru biskup Íslands, Karl Sigurbjörnsson, séra Halldór Gunnarsson, séra Kristján Björnsson, Jóhann E. Björnsson og Sigríður M. Jóhannsdóttir.

Fundinn sátu jafnframt Guðmundur Þór Guðmundsson, framkvæmdastjóri kirkjuráðs, Ragnhildur Benediktsdóttir, skrifstofustjóri, Sigríður Dögg Geirsdóttir, fjármálastjóri og séra Þorvaldur Karl Helgason, biskupsritari, sem ritaði fundargerð.

Pétur Kr. Hafstein, forseti kirkjuþings, sat einnig fundinn að hluta. Þá komu og á fundinn þriggja manna nefnd sem aukakirkjuþing 2010 samþykkti að skipa. 

Aukakirkjuþing var haldið laugardaginn 7. ágúst s.l. í Grensáskirkju þar sem niðurskurður á fjármálum kirkjunnar var til umfjöllunar og var það eina málið á dagskrá. Ályktanir aukakirkjuþings verða sendar formlega til dómsmála- og mannréttindaráðherra en ráðuneytisstjóri sat þingið að hluta auk fulltrúa ráðuneytisins er sat allt þingið svo sem venja er.

2. Kirkjuþing 2010

a) Kirkjuþing 2010.
Pétur Kr. Hafstein, forseti kirkjuþings mætti á fundinn, kl. 11. Forseti vakti athygli á því að í starfsreglum um þingsköp kirkjuþings er kveðið á um að mál skuli rædd á þingmálafundum og skulu síðan almennt hafa borist forseta kirkjuþings sex vikum fyrir upphaf þings. Þó sé nægilegt að skýrslur kirkjuráðs, þjóðmálanefndar og um fjármál þjóðkirkjunnar berist forseta þremur vikum fyrir upphaf þings. Sérhvert þingmál, hvort heldur er frá einstökum kirkjuþingsmönnum, kirkjuráði eða fastanefndum kirkjuþings, skulu vera til kynningar á vef kirkjunnar í að minnsta kosti tvær vikur til andsvara og umræðna eftir að það hefur borist forseta. 

Samþykkt var að farið verði yfir starfsreglur og kannað hvar breytinga er þörf. Einnig var rætt um hvernig heppilegast væri að koma í starfsreglum ákvæði úr Siðareglum vígðra þjóna og annars starfsfólks þjóðkirkjunnar um heimild til að leita upplýsinga úr sakaskrá. Bent var á að eðlilegt væri að ákvæði um slíkt kæmi inn í starfsreglur um sóknarnefndir, presta, djákna og organista. Lagahópnum var falið að útfæra þetta.

b) Þriggja manna nefnd aukakirkjuþings 2010.
Aukakirkjuþing 2010 sem haldið var laugardaginn 7. ágúst 2010 samþykkti tvær tillögur, annars vegar tillögu um samningsmarkmið og hins vegar tillögu um að fela kirkjuráði að halda áfram vinnu við aðgerðaáætlun vegna niðurskurðarkröfu ríkisins á fjárlagalið Biskups Íslands 2011, þar sem tekið verði mið af umræðum á þinginu. Þá kaus þingið þriggja manna nefnd sem vinni með kirkjuráði að útfærslu áætlunarinnar í samræmi við niðurstöðu samninga við ríkisvaldið. Sparnaðaráætlunin komi í heild til umfjöllunar á kirkjuþingi í haust.

Í þriggja manna nefndina voru kjörnir kirkjuþingsfulltrúarnir Ásbjörn Jónsson, séra Gunnlaugur Stefánsson og Katrín Ásgrímsdóttir.

Nefndarmenn mættu á kirkjuráðsfundinn kl. 13 og lögðu fram hugmyndir sem nefndin hafði unnið að með hliðsjón af samþykktum og umræðum á aukakirkjuþingi. 

Kirkjuráð samþykkti að fela fjármálahópi kirkjuráðs að starfa með þriggja manna nefndinni að útfærslu á fram komnum tillögum um niðurskurð. Jafnframt var sömu aðilum falið að ræða við embættismenn dóms- og mannréttindaráðuneytis og fjármálaráðuneytis um þau samningsmarkmið sem kirkjuþing samþykkti. 

Fram kom að brýnt væri að auka upplýsingar til almennings og stjórnvalda um grundvöll fjármála kirkjunnar og ekki hvað síst um hvers eðlis sóknargjöld eru, svo og þá þjónustu sem kirkjan veitir um land allt.

3. Fjármál

Lagðar voru fram síðustu tvær fundargeðir fjármálahóps kirkjuráðs, frá 23. júlí og 16. ágúst.

a) Tillögur fjármálahóps að niðurskurði í fjármálum kirkjunnar.
Fjármálahópur kirkjuráðs fór yfir tillögur aukakirkjuþings 2010 um hvernig mæta megi niðurskurðarkröfu ríkisins en þær voru byggðar á tillögum sem kirkjuráð lagði fyrir þingið og útfærði tillögurnar nánar. - Sjá bókun hér að framan.

4. Fasteignir

a) Fjárhagsáætlun fasteignasviðs
Málinu var frestað.

b) Umfjöllun um sölumeðferð fasteigna.
- Tilboð hefur borist í fv. prestssetrið að Hvoli í Saurbæ. Ákvörðun var frestað og fasteignanefnd falið að meta tilboðið og skila umsögn til kirkjuráðs.
- Tilboð hefur borist í fv. prestssetrið í Tröð, Skeiða- og Gnúpverjahreppi. Samþykkt var að leggja fram gagntilboð.

5. Reglur um greiðslumark

Kristján Björnsson gerði grein fyrir tillögum lagahópsins m.a. að greint verði á milli þess greiðslumarks sem prestssetrasjóður hefur keypt við úttektir og þess er áður fylgdi jörðunum.

Kirkjuráð samþykkti tillögu lagahóps að ákvæði um greiðslur og meðferð greiðslumarks verði bætt við starfsreglur um prestssetur og aðrar fasteignir kirkjumálasjóðs frá 2009.

6. Önnur mál

a) Yfirlit yfir störf fagráðs um kynferðisbrot
Lagt var fram yfirlit yfir störf fagráðsins sem ætlað er fjölmiðlum.

b) Erindi frá leikmannaráði
Erindið fjallar um beiðni leikmannaráðs um fulltrúarfjöldi á leikmannastefnu verði óbreyttur þrátt fyrir fækkun prófastsdæma. Ennfremur var óskað eftir því að leikmannastefna fái áheyrnafulltrúa á kirkjuþingi með málfrelsi og tillögurétt. Lagahópi kirkjuráðs var falið að skoða erindið.

c) Erindi frá Múlaprófastsdæmi
Prófastur í Múlaprófastsdæmi óskaði eftir að fá upplýsingar um ýmsa þætti er snúa að tillögum kirkjuþings um sameiningu prófastsdæmanna. Skrifstofustjóra á Biskupsstofu var falið að svara erindinu.

d) Fulltrúaráð Hjáparstarfs kirkjunnar
Samþykkt var að aðalmenn til næstu tveggja ára yrðu áfram Þorsteinn Pálsson, fv. ráðherra og Rannveig Sigurbjörnsdóttir, hjúkrunarfræðingur, svo og Páll Kr. Pálsson, framkvæmdastjóri í Reykjavík sem kemur í stað Ingibjargar Pálmadóttur fv. ráðherra en skipunartími hennar rennur út á þessu ári. Kristín Magnúsdóttir, kennari í Reykjavík var skipuð áfram varamaður til næstu tveggja ára.

e) Önnur mál
- Erindi barst frá Oddasókn, Suðurprófastsdæmi, um styrk úr Jöfnunarsjóði til að festa kaup á hluta húsnæðis á Hellu, en safnaðarheimili sóknarinnar er þar í hluta húsnæðisins. Þar með eignaðist sóknin allt húsnæðið.
Samþykkt var að veita Oddasókn vilyrði um styrk úr Jöfnunarsjóði að fjárhæð 30 millj. alls til næstu fjögurra ára, 7,5 millj.kr. á ári frá 2011. Málið verður tekið til afgreiðslu á úthlutunarfundi Jöfnunarsjóðs í desember.

- Á fund kirkjuráðs kom Guðrún Ebba Ólafsdóttir sem hafði óskað eftir fundi með kirkjuráði. Með henni komu á fundinn séra Sigfinnur Þorleifsson og dr. Sólveig Anna Bóasdóttir.
Áður hafði hún sent erindi til biskups og átt fund með honum. Hún vill brýna kirkjustjórnina til að taka skýra afstöðu gegn kynferðislegu ofbeldi og lýsa það vera synd.
Biskup upplýsti að reglur frá 1998 um fagráð um meðferð kynferðisbrota innan þjóðkirkjunnar hefði verið endurskoðaðar árið 2009. Þá hafa verið samþykktar á kirkjuþingi 2009 siðareglur er taka til presta og djákna og annars starfsfólks kirkjunnar svo og sjálfboðaliða. Í samræmi við siðareglurnar er nú að fara af stað átak þar sem allir starfsmenn kirkjunnar verða beðnir um að samþykkja að heimila aðgang að sakaskrá m.t.t. kynferðislegs ofbeldis, svonefnd skimun.

Fleira ekki gert og fundi slitið kl. 15,30.
Næsti fundur verður haldinn 23. september og hefst kl. 9.