5. sunnudagur eftir þrettánda

Litur: Grænn.

Vers vikunnar:

„Hann [Drottinn] mun leiða það í ljós sem í myrkrinu er hulið og afhjúpa allt sem í hjarta dylst.“ (1Kor 4.5)

Kollekta:

Vér biðjum þig, Drottinn: Varðveit þú með stöðugri föðurelsku söfnuð þinn, sem vonar á þig. Lát hann ávallt njóta verndar þinnar. Fyrir son þinn Jesú Krist, Drottin vorn, sem með þér lifir og ríkir í einingu heilags anda, einn sannur Guð um aldir alda.

Textaröð:

B

Lexía:

5Mós 30.15-20

Hér með legg ég fyrir þig líf og heill, dauða og óheill.
Ef þú hlýðir boðum Drottins, sem ég set þér í dag, með því að elska Drottin, Guð þinn, ganga á vegum hans og halda boð hans, ákvæði og lög, munt þú lifa og þér mun fjölga og Drottinn, Guð þinn, mun blessa þig í landinu sem þú heldur nú inn í til að taka það til eignar.
En ef hjarta þitt gerist fráhverft og þú hlýðir ekki og lætur tælast til að sýna öðrum guðum lotningu og þjóna þeim, lýsi ég því hér með yfir að ykkur verður gereytt. Þið munuð þá ekki lifa lengi í landinu sem þú heldur inn í yfir Jórdan að taka til eignar.
Ég kveð bæði himin og jörð til vitnis gegn ykkur í dag: Ég hef lagt fyrir þig líf og dauða, blessun og bölvun. Veldu þá lífið svo að þú og niðjar þínir megið lifa með því að elska Drottin, Guð þinn, hlýða boði hans og halda þér fast við hann því að þá muntu lifa og verða langlífur í landinu sem Drottinn hét að gefa feðrum þínum, Abraham, Ísak og Jakobi.

Pistill:

Gal 5.22-26

En ávöxtur andans er: kærleiki, gleði, friður, langlyndi, gæska, góðvild, trúmennska, hógværð og sjálfsagi. Gegn slíku er lögmálið ekki. En þeir sem trúa á Krist hafa krossfest holdið með ástríðum þess og girndum.
Fyrst andinn hefur vakið okkur til lífs skulum við lifa í andanum. Verum ekki hégómagjörn svo að við áreitum og öfundum hvert annað.

Guðspjall:

Matt 13.44-52

Enn sagði Jesús: „Líkt er himnaríki fjársjóði sem fólginn var í jörðu og maður fann og leyndi. Í fögnuði sínum fór hann, seldi allar eigur sínar og keypti akur þann.
Enn er himnaríki líkt kaupmanni sem leitaði að fögrum perlum. Og er hann fann eina dýrmæta perlu fór hann, seldi allt sem hann átti og keypti hana.
Enn er himnaríki líkt neti sem lagt er í sjó og safnar alls kyns fiski. Þegar það er fullt draga menn það á land, setjast við og safna þeim góðu í ker en kasta þeim óætu burt. Svo mun verða þegar veröld endar: Englarnir munu koma, skilja vonda menn frá réttlátum og kasta þeim í eldsofninn. Þar verður grátur og gnístran tanna.
Hafið þið skilið allt þetta?“
„Já,“ svöruðu lærisveinarnir.
Jesús sagði við þá: „Þannig er sérhver fræðimaður sem orðinn er lærisveinn himnaríkis líkur húsföður sem ber fram nýtt og gamalt úr forðabúri sínu.“

Sálmur:

298

Ó, Herra Guð, lát hjá oss mætast
þitt heilagt orð og rétta trú,
en sérhvern upp þann ávöxt rætast,
sem eigi gróðursettir þú.
Á burt hvern lygalærdóm hrek,
en líf í sannleik hjá oss vek.

Lát svikaspár ei sálir villa
frá sannleiksbraut á myrka leið,
ei fyrir hjörtum huggun spilla,
er hlotnast þeim af Jesú deyð,
lát byrgjast voðans breiða djúp,
rek burt hvern úlf í sauðahjúp.

Að þitt nú, Drottinn, orð vér eigum,
það ávann þinna votta blóð.
Ó, hversu það vér þakka megum,
að þessi perla dýr og góð,
sem týnd var, fundin aftur er
og ávallt nú sinn ljóma ber.

Landstad - Helgi Hálfdánarson

Bæn dagsins:

Góði Guð, þú lætur okkur ekki ein heldur kallar okkur með orði þínu aftur og aftur á réttan veg lífsins. Gef að við hlustum alltaf á þig þegar þú kallar og að við séum alltaf hjá svo að trúin beri góðan ávöxt, fyrir Jesú Krist bróður okkar og Drottin. Amen.